Засгийн газрын 2011 оны 339, 340 дүгээр тогтоолоор батлагдсан “Гамшгийн аюулын тухай зарлан мэдээллийн дохио дамжуулах журам”, “Гамшгийн үеийн дайчилгаа, нүүлгэн шилжүүлэх журам”-ын дагуу өнөөдөр /2025.03.27/ 16:00 цагт гамшгийн аюулыг зарлан мэдээлэх дохиогоор дадлага сургуулийг зохион байгууллаа.
Гамшгийн аюулын тухай зарлан мэдээллийн эхний дохио дуугарах үед “Нуугд-Суу-Хүлээ” зарчмын дагуу аюулгүй байдлыг сахин, ШХИС-ийн хичээлийн байр доторх хөдөлгөөнийг хязгаарлаж хоёр дахь дохио дуугарах үед “Гүйхгүй- Ярихгүй-Түлхэхгүй-Эргэж буцахгүй” зарчмыг баримтлан толгойгоо хамгаалах /цүнх, хавтгай хатуу зүйлс дээрээ барих/ зүйл барин, баруун гарын дүрэм баримтлан байрнаас аюулгүй цэгт цугларч Гамшгийн аюулын тухай зарлан мэдээллийн дохиогоор ажиллахын ач холбогдлын тухай товч мэдээлэл, ШХИС-ийн гамшгаас хамгаалах бүлгийн бэлэн байдал, нэг бүрийн хамгаалах хэрэгслийн хангалтыг сургуулийн 1 дүгээр давхарт олон нийтэд танилцуулав.
Энэ удаагийн сургалтад ШХИС-ийн Гамшгаас хамгаалах мэргэжлийн ангийн нийт бүрэлдэхүүн төлөвлөгөө, чиглэл зааврын дагуу ажилласан болно.
Сургалтыг зохион байгуулахад арга зүйн дэмжлэг үзүүлсэн Сүхбаатар дүүргийн Онцгой байдлын хэлтсийн орлогч дарга, хошууч Ж.Энхтөрд талархал илэрхийлье.
ШХИС-ийн Мэргэжлийн анги
